Heimavinna: Bloggfærsla um grein

Fyrir næstkomandi mánudag eiga allir að lesa eina af greinunum sem linkað er í hér fyrir neðan og skrifa færslu upp á a.m.k. 400 orð um greinina. Af færslunni á að vera augljóst að viðkomandi hefur lesið greinina vel og vandlega. Færslan á samt ekki eingöngu að samanstanda af endursögn á greininni. Æskilegt er að þið deilið ykkar skoðun á greininni og þeim vangaveltum sem hún vekur hjá ykkur.

Kristin Thompson: Has 3D already failed? og Has 3D already failed? the sequel (part one) (part two)
Vangaveltur Kristin Thompson um þrívíddartæknina. Þetta er vissulega ansi stór pakki (allar þrjár greinarnar eru frekar langar) en það er fullt af áhugaverðum pælingum í þessu og þið verðið margs vísari eftir lesturinn. Svo er þetta um hluti sem eru að gerast núna, við horfum upp á það að sífellt fleiri myndir eru í þrívídd (meira að segja Sveppi), og bráðum kemur fyrsta alvöru íslenska þrívíddarmyndin (Þór).

Kristin Thompson og David Bordwell: The Best films of 1920
Thompson og Bordwell hafa undanfarin ár, í stað þess að fjalla um bestu myndir ársins sem leið, fjallað um bestu myndir ársins fyrir 90 árum síðan. Þannig að í stað þess að skrifa um bestu myndir ársins 2010 skrifa þau um árið 1920. Þetta er að mörgu leyti áhugaverð lesning...

David Bordwell: "I don't hate anybody, not even my interrogators"
Tiltölulega stutt grein um Jafar Panahi, íranska leikstjórann sem var handtekinn á dögunum og dæmdur í 6 ára fangelsi (og 20 ára kvikmyndagerðarbann) fyrir að gera bíómyndir.

David Bordwell: Errol Morris, boy detective
Errol Morris er einn mikilvægasti og áhugaverðasti heimildamyndargerðarmaður síðustu 30 ára. Þetta er bæði grein um hann og viðtal við hann.

David Bordwell: Unsteadicam chronicles, A Glance at blows og Bond vs. Chan: Jackie shows how it's done
Þrjár áhugaverðar greinar um sama efnið: myndatöku og klippingu í hasarmyndum. Ef þið hafið minnsta áhuga á hasarmyndum held ég að þið mynduð hafa gagn og gaman af þessum greinum. Seinasta greinin fjallar m.a. um Police Story, mynd með/eftir Jackie Chan sem við munum horfa á í næstu viku (minnir mig).

David Bordwell: No coincidence, no story
Um hlutverk tilviljana í sögu-uppbyggingu kvikmynda. Nokkuð áhugaverð.

Kristin Thompson og David Bordwell: Inception; or Dream a Little Dream within a Dream with Me og Revisiting INCEPTION
Áhugaverðar og öðruvísi greinar um Inception. Bordwell og Thompson reyna m.a. að útskýra (eða geta sér til um) til hvers þessi mikla söguflækja í myndinni er. Grunnhugmyndin: Inception er ekki flókin af því að hún gerist í draumum (í draumum í draumum) heldur gerist hún í draumum af því að hún er flókin.

David Bordwell: Scorsese, 'pressionist
Um áhrif mismunandi kvikmyndastefna á Martin Scorsese, einna helst expressjónisma og impressjónisma. Áhugavert sambland kvikmyndasögu og greiningar á nýlegri myndum.

Verkefni í handritamöppu

- 1. Persóna (verkefni 1 í glærum)
Búið til persónu í eins miklum smáatriðum og við mögulega getum.
Hvar/hvenær er hún uppi? Aldur, foreldrar, systkini, kynhneigð, stétt, menntun, starf, stjórnmálaskoðanir o.s.frv. Ekkert smáatriði er of smátt.
Hvaða áhrif hefur hver þáttur á persónuna? Hvernig fáum við þetta allt til þess að passa saman? Er hægt að skapa persónu í svona smáatriðum án þess að skapa sögu hennar um leið?
Búið að lokum til hvatningaratvik fyrir persónuna. Eitthvað sem gæti komið lífi hennar í uppnám og skapað átök.

2. Staðarlýsing (æfing 3 í glærum)
Horfið á myndbrot sem gerist á áhugaverðum stað (í tímanum var horft á stutt myndbrot úr fyrsta þætti af Stephen Fry in America).
Gerið lista yfir áhugaverð smáatriði.
Veljið svo úr þá punkta sem mestu máli skipta (sem t.d. gefa til kynna stemninguna á staðnum).
Skrifið staðarlýsingu sem er ekki lengri en ein efnisgrein (eins og staðarlýsingar eru yfirleitt í kvikmyndahandritum).

3. Hljóð (æfing 5 í glærum)
Finnið a.m.k. 10 hljóð sem kalla fram einhverja aukamerkingu (tilfinningar, minningar eða óljósar hugmyndir).
Ímyndið ykkur hvernig þessi hljóð gætu breytt stemningunni á staðnum í staðarlýsingunni. Reynið að finna hljóð sem myndu ýkja upp og bæta við (eða gjörbreyta) stemningunni á þessum stað.

4. Athugun á persónu (æfing 7 í glærum)
Horfið á stutt myndbrot (horft var á barsenu úr The Best Years of Our Lives).
Veljið ykkur eina persónu sem vekur athygli ykkar og fylgist með henni.
Leggið útlit og önnur aðalatriði á minnið, komið svo aftur og gerið lista yfir atriði sem einkenna persónuna eða afhjúpa eitthvað um hana. Hvað getum við vitað um þessa persónu? Hvað getum við ímyndað okkur?
Verið nákvæm. Lýsið smáatriðum (lýsingarorð...)
Strikið svo undir þau atriði sem mynda kjarna persónunnar eins og þið sjáið hana fyrir ykkur.

5. Sögu-útlína 1: Furðufrétt
Veljið ykkur furðulega frétt (þið fenguð ljósrit með nokkrum furðufréttum af http://www.newsoftheweird.com/).
Semjið sögu-útlínu að stuttmynd sem er byggð á þessari furðulegu frétt, þar sem hver sena er ein efnisgrein.
Svarið grundvallarspurningunum 8 (sjá glærur).
Hafið að minnsta kosti 7 senur.

6. Sögu-útlína 2: Þjóðsaga (verkefni 9-11 í glærum)
Veljið ykkur íslenska þjóðsögu (þið fenguð ljósrit í tíma).
Semjið sögu-útlínu að stuttmynd sem er byggð á þessari þjóðsögu.
Ákveðið hver aðalpersónan á að vera.
Ákveðið hvar/hvenær myndin gerist (þið megið færa þjóðsöguna í samtímabúning, eða halda henni í fortíðinni).
Svarið grundvallarspurningunum 8.
Sögu-útlínan á að vera a.m.k. 10 senur.

7. Sögu-útlína 3: Persóna + uppgötvun (verkefni 13 í glærum)
Vinnið með persónuna úr verkefni 1.
Skrifið sögu-útlínu að stuttri mynd þar sem uppgötvun sem persónan gerir gegnir stóru hlutverki (uppgötvunin er annað hvort hvatningaratvikið eða hápunkturinn).
Uppgötvunin verður að gerast í mynd.
Áhorfendur verða að átta sig á því þegar uppgötvunin á sér stað.
Þetta er stutt mynd, ekki bara ein sena.
Hafið uppgötvunina myndræna (persónan á ekki að þurfa að útskýra hana).
Sögu-útlínan á að vera a.m.k. 7 senur.

8. Handrit
Veljið eina sögu-útlínu (1, 2 eða 3).
Skrifið 5-15 bls. handrit í Celtx eftir þessari sögu-útlínu.
Hafið eftirfarandi í huga:
Myndi sagan virka betur ef önnur persóna væri aðalpersóna?
Er hvatinn nógu sterkur til þess að hrinda af stað atburðarásinni? Hvernig má styrkja hann
Ef þú myndir nota aðra aðalpersóna, þarftu þá annan hvata?
Veldur meginhvöt aðalpersónunnar átökum? Af hverju ekki? Er hægt að kveikja átök með því að breyta þessari meginhvöt, eða meginhvöt andstæðingsins? Er aðalpersónan kannski of passíf?
Kemur staðsetningin stemningunni til skila? Myndi það breyta einhverju að bæta inn hljóðum eða myndum?